जागतिक पोहे दिवस.

जागतिक पोहे दिवस

"चव, संस्कृती आणि आपुलकीचा दिवस"

“ज्या पोह्यांच्या साक्षीने लग्नगाठी जुळतात, त्या पोह्यांचे वर्णन शब्दात कसे करणार?”

हा प्रश्न नुसता विचारायचा नसतो, अनुभवायचा असतो... एकाच वेळी चव, संस्कृती, स्नेह आणि स्मृती जपणारा पदार्थ म्हणजे ‘पोहे’.

प्रत्येक घरात कधी ना कधी पोहे झालेले असतात आणि कधी ना कधी कुणाच्या तरी पोहेमुळे आयुष्य बदललेलं असतं , अगदी “कांदेपोहे मीटिंग” पासून ते “म्हणजे पोहे करतात ना? म्हणजे घरचं आहे...

७ जून हा दिवस जगभरात "जागतिक पोहे दिवस" म्हणून साजरा केला जातो.

२०१५ साली, ट्विटरवर गमतीने हा दिवस सुरू झाला. मॅगीच्या बंदीनंतर एका ट्विटर युजरने “#पोहेदिवस” अशी कल्पना मांडली, आणि पोहेप्रेमींच्या मनात ती घर करून बसली.

कोणी याचा अधिकृत जनक नाही, पण ही कल्पना इतकी भावली की, पोह्यांना आपला दिवस मिळालाच.

आपण कुठल्याही भागात राहात असलो, पण पोह्यांचं स्थान मनात एकच असतं – “पहाटेचा नाश्ता म्हटलं की पोहे हवेतच.”

कांदे पोहे – सकाळचं संगीत म्हणजे पातेल्यातली फोडणी आणि कांद्याचा सुवास.बटाटे पोहे – चव आणि समाधान दोन्ही देणारे.दडपे पोहे – कोल्हापुरी चव, थोडेसे रडके पण अफलातून.इंदोरी पोहे – थोडे गोड, थोडे चुरमुरे आणि कुरकुरीत सेवमुळे खास.

नागपुरी पोहे – वरून झणझणीत “तर्री”, म्हणजे मिसळीचा चुलत भाऊ!

पोह्यांचं हे सौंदर्य म्हणजे कोणत्याही भाजीत रंगवता येतं – कोबी, मटार, वांगी, दोडकी, घोसाळी! आणि हाच तर त्यांचा  “साधेपणातली बहार!”

 

मुलीच्या पोहे-कौशल्यावर निर्णय होतो असं म्हणतात, पण पोहे म्हणजे फक्त लग्नासाठी नाही, ते आपल्या रोजच्या आयुष्याचा भाग आहेत.

अन्न म्हणून पोहे एवढे लवचिक आहेत की त्यातून तुम्ही भजी करू शकता, कटलेट बनवू शकता, किंवा भिजवून हलवा, खीर, पॅटिस तयार करू शकता.आजकाल जग वेगानं धावतंय , झटपट पदार्थ, इन्स्टंट मिक्स, रॅपिड डिलिव्हरी… पण अजूनही घरातला फोडणीचा पोह्यांचा सुवास आपल्याला एक वेगळी शांतता देतो.

पोहे हे खाद्यपदार्थ असले तरी त्यातून घरपण, आपुलकी, एकत्रपणा, आणि प्रेम झिरपत असतं

 ७ जून – जागतिक पोहे दिवस,पोह्यांसारखा दुसरा नाही, आणि पोहे वाढणाऱ्यांसारखा आपुलकीचा माणूसही नाही!